Чӗмпӗр чӑвашӗсем пӗлтереҫҫӗ:
Акан 25-мӗшӗ — Чӑваш тӗнчишӗн сaваплӑ та паллӑ кун. 1992 ҫулта Чӑваш Республикин Аслӑ Канашӗн Президиумӗ ҫак куна Чӑваш чӗлхи кунӗ тесе йышӑннӑ, 15 ҫул хушши Раҫҫейри тӗрлӗ регионсенче ентешсем ӑна чаплӑн палӑртаҫҫӗ.
Халӑхӑмӑра ҫырулӑх парнеленӗ Улӑп Ҫыннӑмӑр — И.Я.Яковлев ҫут тӗнчене килнӗ кунхине Сентябрӗн 12-мӗшӗ ячӗллӗ урам уяв вырӑнне ҫаврaнчӗ. Чӗрӗ чечек ҫыххисем йӑтнӑ ватти-вӗтти ҫур ҫул каялла ҫӗкленсе ларнӑ Патриарх палӑкӗ умне 12 сехетре пуҫтарӑнчӗ. Иван Яковлевичӑн ҫуралнӑ кунне халалланӑ уява УОЧНКА ертӳҫи В.И.Сваев уҫрӗ.
— Пирӗн — Чӗмпӗр чӑвашӗсен — ҫакӑн пек вырӑн пурришӗн савӑнмалла. Атӑл тӑрӑхӗнчи халӑхсене ҫутта кӑларассишӗн пурнӑҫ тӑрaшшӗпе ӗҫленӗ И.Я.Яковлева эпир ӗмӗр-ӗмӗр пуҫ тайма тивӗҫ. Паян унӑн ҫутӑ сӑнарне асра тытса халӑхӑмӑршӑн ырӑ ӗҫсем тумалла. Ырӑ чунлӑ ентешсем пулaшнипе ҫӗкленсе ларнӑ палӑк — унӑн ӗҫне хаклани. Манӑн кунта пуҫтарӑннӑ ачасемпе ҫамрӑксене, ватӑсене Аслӑ Вӗрентекен сaмахӗсене тепӗр хут аса илтерес килет: «Раҫҫее хисеплӗр, ӑна юратӑр, вӑл сирӗн аннӗр пулӗ.
Паян Чӑваш чӗлхин кунӗ. Тата ҫавӑн пекех ку уява йышӑннӑранпа 15 ҫул иртрӗ. Уява чӑаш халӑхне ҫутта кӑларакан И.Я. Яковлев ҫуралнӑ кунӗпе ҫыхӑнтарнӑ, вӑл 1848 ҫулта ҫуралнӑ. Чӑнах та питӗ паллӑ ҫын пулнӑ вӑл, питӗ кирлӗ ӗҫ хӑйӗн пурнӑҫӗнче туса хӑварнӑ — чӑвашсем валли 1917-мӗш ҫулхи революцичченех ҫыруллӑх шутласа кӑларнӑ.
Пирӗн пӗрлӗ те алӑ усса лармасть. Эпир 2005 ҫулхи авӑн уйӑхӗнче чӑваш чӗлхине интертетелте сарма пуҫларӑмӑр. Унччен пӗр ҫур ҫул маларах Википедин чӑваш уйрӑмӗ хӑвӑрттӑн аталанма пуҫларӗ. Ӗҫӗсем хуллен-майӗпен пыраҫҫӗ: Википедин чӑваш уйрӑмӗнче 6000 статья патнелле ҫывхаратпӑр, темиҫе сайт уҫса (канашлу, сӑмахсар, уйрӑм ялсен сайчӗсем, шкулсен сайчӗсем, тата ыттисем те), тӗрлӗ тӗслӗ кӗнекесене сканерласа пӗтӗм тӗнче паллашмашкӑн вырнаҫтартӑмӑр, Mozilla Firefox программин интерфейсне чӑвашла куҫартӑмӑр! Тата чӑваш кунӗ тӗлне тепӗр парне — Л.П. Сергеев хатӗрленӗ справочнике вырнаҫтарма пуҫларӑмӑр. КУ уйрӑмах чӑваш чӗлхине вӗренекенсене пулӑшӗ.
Юлашкинчен тата ҫакна каласа хӑварасшӑн: ан манӑр хӑвӑр тӑван чӗлхӳне! Ку вӑл пирӗн мӑн асаттесемпе асаннесен чӗлхи!
Ака уйӑхӗн 23-пе 29-мӗшӗ хушшинче Чӑваш чӗлхин кунне тата И.Я. Яковлев ҫуралнӑ кунне халалласа Чӑваш наци музейӗнче Чӑваш ҫырулӑхӗн эрни иртӗ.
Программа тӑрӑх «Асанне сунтӑхне уҫатпӑр» вӑйӑ, «Чӑваш халӑх тумтирӗ» ятлӑ куҫса ҫӳрекен лекци, тата X - XIII ӗмӗрти чӑваш ҫырулӑхӗ ҫинчен каласа паракан ытти лекцисемпе калаҫусем ирттерме палӑртнӑ. Ҫавӑн пекех чӑваш тӗррипе, пир тӗртмелли мелсемпе паллашма май пулӗ. Рунӑллӑ ҫырулӑх ҫинчен те нумай каласа парӗҫ.
Ҫавӑн пекех 8-11 классенче вӗренекенсем хушшинче ирттернӗ «Пӗр чӗлхе лайӑх, иккӗ вара лайӑхрах» конкурс ҫӗнтерӳҫисене парне парӗҫ. Пӗрремӗш турти ыйтусене прессӑра пичетленӗ, ытти мелсемпе сарнӑ. Конкурса 200 ача хутшӑннӑ. Вӗсенчен чылайӑшӗ тӗплӗн хатӗрленнӗ: хуравламашкӑн тӗрлӗ сӑнӳкерчӗк усӑ курнӑ, ӗҫӗсене илемлетсе ярса панӑ. Иккӗмӗш турӗ ака уйӑхӗн 25-мӗшӗнче Чӑваш наци музейӗн канашлу пӳлӗмӗнче иртӗ. Унта 18 ача хутшӑнӗ. Вӑл кунах финала тухнисене парне тата тӗрлӗ пичет продукцийӗ парса чыслӗҫ. Мероприятине Чӑваш наци вулавӑшӗпе пӗрле ирттереҫҫӗ.
Пирӗн Chuvash.Org пӗрлӗх паян пурне те темиҫе уйӑх пынӑ ӗҫ вӗҫленни ҫинчен пӗлтересшӗн — Mozilla Firefox интерфейсӗ халӗ чӑвашла та пур! Интерфейсне чӑвашла куҫармалли хушӑма (локализацине) кунта тупма пултаратӑр: Firefox-cv-1.0.zip (йывӑрӑшӗ 230 Kb)
Чӑвашла локализаци лартас тесен (Firefox интерфейсӗ чӑвашла пултӑр тесен) сирӗн ҫак ӗҫсене тумалла:
* Чӑвашлатакан файла хушӑм пек лартмалла. Ун валли сирӗн менюри File (Файл) ҫине куҫмалла, кайран Open File: пункта суйламалла. Ҫӗнӗ чӳречере сирӗн cv.xpi файла тупса кӗртмелле.
* Locale-Switcher Extension хушӑма лартмалла (архивра пур, «locale_switcher-2.0-fx+tb.xpi» ятлӑ)
* Firefoxa хупса ҫӗнӗрен ямалла.
* Чӑвашла интерфейс ҫине Менюри ҫак пунктра куҫатпӑр: Tools - Languages (вырӑсла: Инструменты - Локализации).
* Каллех Firefoxa хупса ҫӗнӗрен ямалла.
* Пулчӗ те.
Ҫавӑн пекех ытти мелсемпе архиври vula.txt файлта паллашма пултаратӑр.
Чӑвашла интерфейсне Chuvash.Org хатӗрленӗ. Куҫарма Г. Дегтярёв пулӑшса.
Чӑваш Енӗн ҫут ӗҫ министерстви пӗлтернӗ тӑрӑх паянхи куна «Чӑваш чӗкеҫӗ» конкурса 5 пин ытла ача хутшӑнасшӑн. Хутшӑнас килсен ачасен ун ҫинчен кӑрлачӑн 20-мӗшӗччен пӗлтермелле. Ҫавӑн пекех Тутарстанран 224 ача, Пушкӑртстанран 221 ача хутшӑнасшӑнни пирки пӗлтернӗ.
Хӑй конкурсӗ нарӑсӑн 8-мӗшӗнче иртӗ. Конкурса 3-11 класр ачасем хутшӑнма пултараҫҫӗ. Вӗсен пӗр сехет те вунпиллӗк минут хушшинче конкурс валли ятарласа хатӗрленӗ 30 ыйту ҫине хуравламалла. Хуравланӑ чухне пилӗк тӗсрен пӗрине ҫеҫ суйламалла.
Кашни хутшӑнакан сертификат илӗ, хӑйсене чи лайӑх кӑтартнӑскерсем — парнесене тивӗҫӗҫ.
Конкурса Чӑваш патшалӑх университечӗ, «Хӗрарӑмсем ӑслӑлӑхпа ҫутлӑх ӗҫӗнче» обществӑллӑ организацийӗн чӑваш уйрӑмӗ, Чӑваш Енӗн ҫут ӗҫ Министерстви ирттереҫҫӗ.
Сӑмах май каласан, 2006 ҫулта ку конкурса Чӑваш Енрен 8674 ача, Тутарстанран — 221, Пушкӑртстанран — 494, Чӗмпӗр облаҫӗнчен 80 ача хутшӑннӑ.
2007 ҫулхи кӑрлачӑн 12-мӗшӗнче Википедин чӑваш уйрӑмӗнче статьясен шучӗпе 5 пине ҫитрӗ. Халӗ Чӑваш Википедийӗ 250 чӗлхе уйрӑмӗсен хушшинче 77-мӗш вырӑн йышӑнать. Ҫавна каласа хӑвармалла, нумай пулмасть Вырӑс уйрӑмӗ 125 000 статья шутне иртсе кайрӗ.
Википеди — ирӗклӗ энциклопеди. Паянхи куна Википедире 250 патнелле чӗлхе уйрӑмӗ пур! Википедири статьясене пурте улӑштарма, анлӑлатма, сӳтсе явса тӳрлетме, вулама, ҫӗннисене кӗртме пултараҫҫӗ.
2004 ҫулхи раштав уйӑхӗнче Чӑваш чӗлхеллӗ уйрӑм уҫӑлнӑ. Вӑл унтанпа пурӗ тӑватӑ пин ытла статьяпа тулнӑ! Унта эсир халӗ Чӑваш Республикӑн паллӑ ҫынсен пурнӑҫӗсемпе, ялсен историйӗпе, тата ытти тӗрлӗ информаципе паллашма пултаратӑр.
Чӑваш чӗлхине пӗлекенсем, чӑваш халӑхӗн культуришӗн ҫунакансем, нумай пӗлме тӑрӑшакансем — сире пурне те Википедине хутшанма сӗнетпӗр! Статьясем ҫырӑр, пурисене анлӑлатса тултарӑр!
+7.3 °C